Курсы беларускай мовы

Дарагія бацькі зусім і не зусім маленькіх беларусікаў і беларусачак! Магчыма, вашы сонейкі ўжо задавалі вам пытанне: “Хто мы?”
А калі яны яшчэ не ўмеюць гаварыць, то рыхтуйцеся – хутка спытаюцца. І які будзе ваш адказ? “Мы беларусы”. Пасля вас чакае наступнае заданне: “Мама, тата, раскажы пра беларусаў”.

Вы ўжо думалі, што адкажаце на гэта? А яшчэ “А ці ёсць беларуская мова? А чаму мы на ёй не размаўляем?” На апошняе пытанне адэкватна, хутчэй за ўсё, ніхто з дарослых беларусаў адказаць не можа. Між тым, нацыянальна-культурнае выхаванне – неабходны элемент станаўлення паўнавартаснай асобы. Таму вывад адзін – гаварыць самім і вучыць гэтаму дзяцей!

А каб дапамагчы вам у гэтым, “Цэнтр славянскіх моў і культур” ладзіць курсы беларускай мовы для дзяцей. У нас працуюць вопытныя выкладчыкі, якія не толькі цудоўна валодаюць мовай, але і ўмеюць знайсці падыход да кожнага дзіцяці. Заняткі адбываюцца ў гульнявой форме, тут дзіця зможа не толькі навучыцца прыгожа размаўляць па-беларуску, але і даведацца шмат новага аб культуры і гісторыі нашай Радзімы. Нашы заняткі – гэта зносіны з аднагодкамі, інтэлектуальнае развіццё і проста прыемнае баўленне часу. Разам з дзецьмі і вы зможаце папрактыкаваць беларускую мову, а таксама іначай паглядзіце на сваю краіну, зразумееце, што наша культурная спадчына не ўступае іншым. Вы пачнеце ганарыцца сабою! І паверце, заняткі на курсах беларускай мовы будуць каштоўным укладам у будучыню вашых дзяцей. Бо вы, канечне ж, хочаце, каб яны былі шчаслівыя. Каб былі здаровыя, разумныя, добры жылі. А па-сапраўднаму добра жыць можна толькі ў добрай краіне, праўда ж? І вы, напэўна, хочаце, каб Беларусь стала краінай з высокім узроўнем жыцця, з развітай эканомікай і інфраструктурай, увогуле, каб была сапраўднай еўрапейскай краінай. А для таго, каб мы маглі стаць сапраўднымі еўрапейцамі, нам і нашым дзецям трэба стаць перш за ўсё сапраўднымі беларусамі. Бо візітоўка любой еўрапейскай краіны – яе культура. І, толькі ведаючы сваю мову, сваю культуру, мы станем сапраўднымі еўрапейцамі. А з курсамі беларускай мовы “Цэнтра славянскіх моў і культур” вашы дзеці вырастуць сапраўднымі беларусамі!

“Няма смачнейшай вадзіцы, як з роднай крыніцы” – кажа беларуская народная мудрасць. Прыводзьце сваіх дзяцей на курсы беларускай мовы ад “Цэнтра славянскіх моў і культур” і чэрпайце сілу з жыватворчай крыніцы роднай мовы!